.
.
صح إن الطموح شي كويس و منتاز ، بس بعض الأحيان يكون مشكله ع صاحبه!
أكره ما عليّ – بعد الإنسان اللي يتمنطق و هو ياكل – هو الإنسان اللي بلا طموح ، تحديدا اللي يكون “حطني تلقاني” !
رئيستي من هالنوعية ع فكرة 
الشغل اللي تسويه هالاسبوع ، لو استقيل و اتغرب 30 سنه همن أرجع للمكتب بلقاها تسوي نفس الشغل بنفس مستوى الإنجاز و يمكن بنفس الملابس ماودي أحط بذمتي 
عندها نظرية عجيبة ، دام إن الشغل ماشي وما فيه مشاكل ليه نحاول نتغير ؟ ليه لازم نغير و نشوف طرق جديده و أحسن ؟
بالمقابل ، ربي خلقني إنسانة كل شوي تقترح ، ما عرف أشوف شي و أسكت ! مشتها لي مره مرتين و ثلاث ، و الرابعه جات وسوت معي اجتماع مغلق ، أنا قلت الله يستر شكلي سويت شي غلط و أنا مدري ، ما دريت إن الإقتراحات تضيق صدرها ، وش هالآدمية ذي 
صح إني اقلقت امها كل شوي مرسله لها ايميل ، ولكن ما هكذا تؤكل الكتف ههههه
قال إيش قال ليه تبين تزيدين الشغل ؟ وش فيه شغلنا ؟
قرأت مره في مقال ، يقول الكاتب - اللي مستحيل أذكر اسمه هالحزة - إن أصعب شي هو تغيير البيئة لأن أي تغيير عادة يقابل بالرفض ، حتى لو كان رفض مبدأي ، خصوصا إذا كان التغيير في شي تعود عليه الإنسان بشكل روتيني ، حتى و إن كان هالتغيير راح يخلي حياته أسهل!
شكرا لرئيستي اللي أثبتت لي هالشي بشكل عملي ، و المرضى واجد ما وقفت عليها
“نرجع حق محور حديثنا“
صاحب الطموح – عموما – لا يقبل بأنصاف الحلول و لا يقبل بأي مستوى غير الإمتياز ، فكيف يتكيف مع رئيسة جايتن للداوم تبي تسوي نفس الشغل يوميا بنفس الطريقة لين تموت؟ (أتمنى وصلت لكم المعلومه إني طموحه < )
آخر فنتكة من المحروسة ، إذا انضغطت ف شغلة ، قالت محد قال لتس كملي دراستس!
ياخي اشتكيت لتس انا ؟! دافعتن لي من جيبتس ، ولا شايفتني اذاكر ع ظهرتس !؟
عساتس للماحي قولي آمين
قمة الإ حباط من جد !
ع الماشي …
شخصيا ، مقتنعه تماما إن الإنسان لازم يتكيّف مع الإمكانيات الموجودة ، بشرط إنه يستغلها بشكل إيجابي ، لكن من اللي يحدد فعالية الإمكانيات الموجودة في مكان ما من عدمها ؟
هل هو الشخص ولا البيئة ولا الإدارة ؟ أو كلهم ؟
اللي حاب يشارك بالحلطمه يخوش برقله اليمين ، و للبقية حديث 
اول شي عوداً حميداً يا ئشطة وهذا رد سريع لاني ارتب غرفتي خخخخخ (وشرايتس هذا يعتبر طموح برضو ولا <<بالحيل ض3 )
بالنسبة لرئيستتس نقدر نقول 80 من الشعب السعودي الموظف كذا , واللي يغبن انهم هم اللي بالنهاية يترقون وتنعطى لهم المناصب لانهم ببساطة يسوون اللي مطلوب بالملي !!
و صار تأمين لقمة العيش هو اقصى طموح يمكن يوصل له الشخص ..
بس في الغالبية هذا راجع لاسباب او بالاحرى ساعدت فيه اسباب , جايز انهم في يوم كانوا متفائلين ونشيطين لين تكررت عليهم صفعات الحياة المتكررة والمجتمع المليء بالاجحافات لين خلتهم كذا -_- !
بغض النظر عن قوة الطموح او ضعفه خيبات الامل المتكررة لها دور
يعطيتس العافية ق4
مسمس ، اهلا و سهلا
لا تقنعيني انتس رتبتي غرفتس هذا أولا
ثانيا ، كلامتس فيه شي صحيح ، لكن برضو لو كان فيه صعوبة ف اعتماد أي تغيير في بية العمل ، المفروض الواحد مب يصير حطني تلقاني عاد مره وحده
يقدر الواحد يبدأ التغيير – للإيجابي طبعا – ببداية التغيير في نفسه ، و بهالطريقة ينتقل التغيير تدريجيا منه إلى الدائرة المحيطة اللي تشمل الموظفين الي معه و يمكن تمتد إلى المحيط الأكبر . يسمونها “سيركل اوف انفلونس “. وهذي طريقة مفيدة أكثر من غيرها إذا كانت الإدارة ناشبة مثل حالة اللي عندي
لا تعبتي و عاش من شافتس (قلب)
الطموح ما أحد يعارضه، بس الواقعية برضو شي كويس يساعد على الحياة << من زمان ما انلفعت!
لا جد هيهو ،
عن نفسي ما أقدر أفتي، أحب الطموح مثل الكل، لكني أحترم رأي رئيستك في حقها انها تشتري راسها!
المهم أخبارك بس؟!
miss u << هذا بس عشان تدرين وش قد منفوحة تطورت : )
.
اووه عبير هانم هنا
أجل تحترمين رأيها ؟
ترا ما ودي اطقتس بيوم خميس
أخياري طيبه و مشتاقين لتس يا منفوحه (قلب)
سالخييير يا عسل ..
انا اشوف ان اي شخص يكون بمنصب عالي يطمح للاعلى طبعا لو كان خذى هالمنصب عن جدارة فشكل رئيستك هذه متعيّنة بواسطة خخخخخخخخ !
والله المفروض تحمد ربها ان عندها موظفة زيك قاعده تصب عليها اقتراحات للتطوير احتسبي الاجر
صاحبتك اللي هي انا طموحة لابعد درجة وهذا اللي متعبني نفسيا ؛ (
جوجو ، يالله حيها (قلب)
الحال من بعضوو يختي و قسم بالله وصلت لحالة اني احتسي مع نفسي لا تنرفزت منها بالدوام جابت لي الجني
نورتي :*
( فيس نهله تقول ما معقول يا جماعه الشغل داااا )
أن تكون رئيستك غير طموحه أفضل من أن تدعي الطموح و تلزق الشغل فيك و ترفع فيك ألين تحسين إنك الشهر الجاي جايتك ترقية ثم تسحب و تكتشفين إنك غبية ..
هنا ما يصير فيه مجال للطموح أو ( الإستطماح خخخ ) يتحول الموظف بقدرة قادر إلى شخص يستلكع لأن نتايجة طيبه ..
نرجع للطموح .. اللي يردعه قبل العمل اتوقع البيئة يعني عادةً ما يرتبط الطموح بشيء خارج عن المألوف , لذلك يبدأ اشخاص من هالبيئة اللي انقردنا فيها ( لا شعورياً ) بالتحطيم ,عارفة يوم نقول نحتاج ثقافة النظام و ثقافة الإنتخابات برضو نحتاج إلى ثقافة الطموح و كيف نتعامل مع هالفئة من الناس .. شخصياً يا هيهو أحب فيك هالشي و لا أقولك إني مثل رئيستك اللي حبيتها من أول إجتماع مغلق خخخ لكن أقولك لاااا يوقف إذا ما شفتي نفسك بالمكان اللي إنتِ فيه غيريه حتى لو مثلاً المميزات قلّت ..
مدري هرجت واجد بس سؤال أخير متى تآخذين إجازتك عشان نآخذها سوا و نصيف مع بعض حلفت و السفر عليّ < يا صبرها D11
أوه لا لا ، شمشم هون
هههههههههههههه يا نهله ذي تجمع من حسناتس لين تلحفت
، يختي مدري وش بلاهم الرئيسات وراهن يصيرن نذلات ؟ وراهن يسون زحمه بفهم؟ ياخي صيروا اوادم و تقبلوا وجهات النظر و طبقوا الاقتراحات الزينه ما حسها صعبه !!
بالنسبة لتغيير الدوام " البيئة" أنا معتس و اوافقتس ع كلامتس كثير ، و هذاي أرقل بس متصبره لين طاح شعري و الظاهر لا غيرت دوامي بتحجب وقتها لإني وقتها بصير صلعا
ع فكرة ، الاجازه اخذتها و توي راجعه هههههه :$ بس منيب اخالف لو تبين نسافر اليومين ذي و ع حسابتس ترا السفره معتس تنشرى بذهب < تبيتس تدوكرين و توافقين